Ab Meera ghabra gayi, aur Neeraj ne dekha ki Meera ghabra gayi hai. Toh usne situation ko sambhalne ke hisab se kaha.

Neeraj - Dekhiye, Mr. Kapoor, abhi mujhe lagta hai aap dono ko apni table par laut jana chahiye. Ye sare sawal jawab karne ke liye yeh sahi jagah nahi hai.

Rohan (harsh tone) - Tumse baat nahi kar raha hu main. Meera, bolo bolo. Jawab do. Isi liye ye badlav aaya na tumhare andar?

Meera itni der se chup thi. Lekin ab uska kuch kehna jaruri ho gaya tha. Isliye usne dheere se Rohan ko kaha.

Meera - Rohan, dekho aisi koi baat nahi hai.

Rohan - Toh matlab tum dono date par nahi aaye ho yaha?

Meera - Nahi. Neeraj humari divorce case mein hi, Arjun ji ko assist kar raha hai. Unhone khud mujhse kaha ki court mein hearing hone tak sab kuch Neeraj hi sambhalega. Toh Tumhari aur meri last baat hone ke baad aaj main Neeraj se yaha apne case ke silsile mein hi milne aayi thi.

Rohan - Achaaaaa!!! Toh ek formal meeting ke liye, tum maroon color ki sexy si dress pehan kar, is romantic si jagah par aayi ho. Aur toh aur, lawyer sahab ke hath me case ki ek bhi file nahi hai. Wah Meera wah! Tum toh player nikli. Pehle pati se divorce liya nahi ki, apne lawyer ke sath hi chakkar chala liya.

Meera - Rohan, mujhe kuch kehne se pehle, tum khud kya kar rahe ho wo dekho. Khud toh is ladki ke sath shadi fix kar ke abhi yaha date par aaye ho, aur mujhe ye sab bol rahe ho? Tumhara koi hak nahi banta mujhse yeh sab kehne ka.

Meera ki baat par Rohan ne jara sa bhi dhyan nahi diya, aur wo apni hi baat aagebolta raha.

Rohan - Toh yeh salah bhi tumhare personal lawyer ne hi di hogi, mujhse jaldi se jaldi divorce le kar khul ke ek dusre ko date karne ki?

Meera - Rohan, kya please is bare mein hum baad mein baat kare? Main tumhe baad mein sab samjha dungi. Mujhe samjhane ka mauka toh do.

Rohan - Mujhe jo samjhana tha, main samajh gaya hu. Mujhe mera faisla lene ke liye aur kuch janane ki koi jarurat nahi hai.

Meera dar gayi. Use andaza tha ki Rohan kis faisle ki baat kar raha tha. Uska dar use sach hote huye dikh raha tha.

Meera - Konsa faisla Rohan? Pata nahi tum kya bol rahe ho. Main keh rahi hu na baad mein mil kar shanti se baat karte hai. Main dungi tumhare, har sawal ka jawab. Bas abhi yaha wo sari baaten nahi karte hai.

Rohan - Arey Meera, pareshan mat ho. Main nahi bigad raha tum logo ki date. Continue karo, hum nahi karenge tum dono ko disturb. Chalo Urmila, chalte hai yaha se. Inhe privacy dete hai.

Itni der se Urmila chup reh kar, shanti se tamasha dekh rahi thi. Usne jo chingari chhidki thi, uski aag bante huye wo dekh rahi thi.

Rohan - Chalo Urmila. Baithi kyu ho?

Urmila - Rohan, par tum kis faisle ki baat kar rahe the, wo toh batate jao. Aise aadhi adhuri baat kar ke jana thik nahi.

Meera - Han Rohan, ab bol hi do, kis faisle ki baat kar rahe the tum?

Rohan tabhi kursi se uth kar khada tha aur Urmila ke uthne ka intezaar kar raha tha. Lekin fir wo wapas kursi par baith gaya, aur usne dheemi awaz mein Meera se kaha.

Rohan - Toh fir suno. Mera faisla janna hai na tumhe? Dhyan se sunna aur dimag mein fit kar lena. Main … Mutual divorce lene ke liye, ab tayar nahi hu. Ab main court tak le kar jaunga ye case.

Ye keh kar usne table par dono hath patke aur wo kursi se fir uth khada hua. Is baar usne Urmila se kaha nahi, balki seedhe uska hath pakda aur wo use bhi waha se apne sath le kar gaya.

Rohan aur Urmila ki pehli date toh waise hi barbad ho chuki thi. Isliye wo Urmila ko waha se seedhe restaurant ke bahar le kar gaya.

Car ke pass aane ke baad wo yaha se waha chakkar lagane ke baad apne gusse ko shant karne laga.

Urmila magar shanti se khade reh kar Rohan ko bechain hote huye dekh rahi thi. Waise toh thodi der pehle restaurant ke andar jo bhi hua, usme uska fayad hi tha. Inka divorce lamba chale, aur uski Rohan se shadi jaldi na ho, yahi toh wo chahti thi. Isse use ye sochne me zyada waqt mil jata ki, Rohan ke sath shadi kaise todni hai.

Urmila - Toh ab done hai fir. Tumhe ab lamba samay lag jayega, ye court kacheri ke chakkar mein. Toh tum samne mana kar do humare rishte ke liye.

Rohan - Tum sach mein pagal ho ya bas pagal hone ka natak karti ho? Tumhe dikh nahi raha, main pehle se hi pareshan hu yaha aur tumhe abhi bhi wahi sab baaten karni hai?

Aur kya jarurat thi tumhe, waha usse ja kar baat karne ki? Hamari bhi date barbad ho gayi us chakkar mein.

Urmila - Dekho lekin tum ye baat accept kyu nahi kar lete ki tumhara ye tumhare ex wife ke sath chalne wala jhagda jaldi khatam hone wala nahi hai. Toh kyu tum mujhe tumhari zindagi mein shamil karna chahte ho. Humari pehli hi date thi aaj Rohan, wo tak barbad ho gayi, is sab ke chakkar mein. Socho aage aur kya kya hoga? Hum toh kabhi sath chain se jee hi nahi payenge.

Rohan (Irritated) - Chalo ghar chalte hai. Mujhe abhi is baare mein kuch baat hi nahi karni hai. Baitho andar, main tumhe ghar chod deta hu.

Meera aur Neeraj bhi waha se nikal kar Nikita ke ghar chale gaye the. Meera bechain ho kar kamre ke chakkar kaat rahi thi, toh Nikita aur Neeraj usko chakkar lagate huye dekh rahe the.

Meera - Neeraj ko le kar abhi main apne ghar nahi ja sakti thi. Isi liye tumhare yaha chale aaye.

Nikita - Ab aas pados walo se darne ka bhi kya matlab hai? Jis insan ko iske bare mein nahi pata lagne dena tha, use toh waise hi pata chal chuka hai.

Meera - Ab main kya karu yaar! Itne ache note par us din uski aur meri baat khatam hui thi, aur aaj ye sab …  

Neeraj - Ab hume thodi pata tha, ki Mr. Kapoor aur unki mangetar bhi waha par honge?

Meera - aur sab se badi baat toh yeh hai, ki wo khud date nahi sidhe shadi kar raha hai us ladki ke sath, lekin mujhe waha ulta sidha suna gaya. Ab wo mutual divorce ke liye hi mana kar raha hai.

Nikita - Dekh Meera, ye na mujhe lag raha hai, chalta hi rahega. Kabhi tu adi rahegi, kabhi wo. Toh isliye ab tu accept kar le is baat ko, ki aage sab kuch mushkil hi hone wala hai, aur us hisab se hi ab tujhe teri life navigate karni hogi.

Meera ne hatash ho kar Neeraj ki taraf dekha. Iske pehle toh wo khud adi huyi thi, lekin Neeraj se milne ke baad uska cheezo ko le kar najariya badal raha tha. Wo zindagi mein aage badhna chahti thi. Purana sab kuch piche chodna chahti thi, aur Rohan bhi toh yahi chahta tha. Lekin ab use ye sab samjhane ki takat Meera mein nahii bachi thi. Wo toh Meera se badla lene ke liye apni dusri shadi bhi daav par lagane ke liye tayar tha.

Waha Rohan ne Urmila ko ghar par drop kiya, aur wo apne ghar chala gaya. Ghar ke andar jate hi wo turant nahane chala gaya. Kyuki uska dimag gusse se itna garam ho chuka tha, ki khud ko shant karne ke liye nahane se behtar option use nazar nahi aa raha tha.

Meera ko kisi aur mard ke sath dekhne ka khayal bhi uske dil ko dard pahucha raha tha. Chahe dono ke beech aaj kitne hi manmutaw ho, lekin ek samay tha, jab dono ke beech mein bahut pyar hua karta tha. Aaj wo pyar nahi bacha tha, par fir bhi Rohan ko is baat ko aacept karne mein bahut takleef ho rahi thi, Meera ki zindagi mein, uske alawa bhi koi aur aa sakta hai, ki Meera  uska alawa bhi kisi aur se pyar kar sakti hai.

Wo shower ke niche khada tha, aur thade pani ko apne sar par le kar apne gusse ko shant karne ki koshish kar raha tha, lekin wo apni koshish mein nakam raha. Use Meera par bahut gussa aa raha tha. Use aisa lag raha tha, ki wo kheech kar Meera ko Neeraj se alag kar de, aur waha se le kar aaye. Meera ban than ke, uski favorite maroon color ki dress pehan kar. Kisi aur ke liye Meera itna sajh dhaj kar nikli thi, ye dekh kar use aur gussa aa raha tha. Lekin wo ab gussa karne ke alawa aur karta bhi kya?

Waha Urmila ke  Ghar ke andar kadam rakhte hi uske maa papa ke sawal shuru ho gaye, ki date kaisi rahi? Itne jaldi wapas kaise aa gaye? Rohan kaisa ladka hai? Use Rohan acha laga ya nahi? Vagaira vagaira …

Urmila ne unke har ek sawal ka jawab diya, aur apne kamre mein jane lagi. Tabhi uski maa ne wapas awaz lagayi. Meera ruk gayi.

Maa - Woh … apna phone wapas dete jana.

Urmila ne ek gehri sans le kar chodi, aur apni purse se phone nikal kar apni maa ke hatho mein somp diya, aur jhat se wo sidiya chadte hue apne kamre me chali gayi.

Kamre ke Andar jane se pehle usne kamre ke bahar toh koi khada nahi hai ye thik se jhank kar dekh liya. Aur fir andar ja kar kamre ka darwaja thik se band kar diya. Darwaja thik se lock hua hai ya nahi ye bhi usne do baar check kar liya.

Fir jaldi se apne bistar ke pass ja kar usne gadda upar kiya aur bistar ke andar rakha hua ek baksa usne bahar nikala. Usne us bakse ko dheere se khola toh andar kya tha? Bakse ke andar ek phone rakha hua tha. Urmila ne wo phone bahar nikal kar usko switched on kiya.

Phone on hone ke baad usne us par ek number dial kiya, aur phone ki ghanti bajne lagi. Samne ke kisi ne phone uthane ke baad Urmila ne yaha se baat karna shuru kiya.

Urmila (dheemi awaz) - Hello! Han, main bas abhi ghar wapas aayi. Tum kaha ho? Acha, hmm. Mera nasib acha tha, ki aaj waha uski ex wife apne naye boyfrind ke sath date par aayi thi, aur wo dekh kar Rohan ko bahut bura laga hai. Maine bhi jam kar aag mein ghee dalne ka kam kiya hai. Han, ab kya, Rohan ne gusse mein aa kar mutual divorce lene se inkar kar diya hai. Isme hamara hi fayda hai. Hume aur thoda waqt mil payega, aur tab tak hum koi plan bana lenge. Maa papa kaise hai, tumhe toh pata hi hai. Wo har waqt mujh par nazar rakhe hai. Abhi main phone rakh rahi hu. Tumhe kal isi waqt par phone karungi. Han, Bye.

Yeh keh kar Umrila ne phone kaat diya, aur phone ko fir se switched off kar ke use us bakse ke andar chupa kar rakh diya. Bakse ko bistar ke andar rakh kar usne us par gadda dal kar fir se pehle jaise thik kar diya, aur wo fresh hone washroom chali gayi.

Aakhir usne kise phone lagaya tha. Use aise kisi se phone chupa kar baat karne ki naubat kyu aayi thi? Uske maa papa us par nazar kyu rakhe huye the? Kya wo chup chup kar apne boyfriend se baat kar rahi thi? Ya koi aur baat thi? Janane ke liye padhiye Shaadi Barbadi Aashiqui sirf Orange global stories par.