Rohan aur Meera, finally ek faisle par aa chuke the, aur us baat ko hue ab do din ho chuke the. Aur do din baad, yaani ki aaj, Rohan aur Urmila ke ghar walo ne un dono ka milna plan kiya tha.

Urmila, Rohan se milne ke liye tayar toh nahi thi, lekin wo apne ghar walo ki zid se aage ja bhi nahi sakti thi. Isliye na chahte huye bhi wo apni maa ki pasand ki salwar kameez pehan kar taiyar ho gayi. Rohan usse lene uske ghar aane wala tha.

Waha Rohan bhi bahut ache se tayar ho kar ghar se nikla tha. Nikalne se pehle usne apni selfie khich kar apni mummy ko bhej di. Rohan khush tha, Urmila se milne ke liye kafi excited tha.

Wo Urmila ke ghar pahuncha aur Urmila ke niche aane ka intezaar karne laga. Kuch der baad Urmila apni mummy ke sath neeche aayi. Uski nazre hamesha ki tarah jhuki hui thi. Jab bhi uske maa aur papa uske samne hote the, wo nazre utha kar nahi dekhti thi. Rohan ne Urmila ke maa papa ke phir ek baar pair chhu kar, unka ashirvad liya, aur phir Urmila aur wo sath sath car ki aur chale gaye. Dono car mein baithe, aur Rohan ne car start kar ke bahar ki aur ghumayi. Itne  mein hi Urmila ka tej tarrar roop samne aa gaya.

Urmila - Mil gayi shanti tumhe, ye milne ka plan bana kar?

Rohan (Haste huye) - Arey, maine kya kiya? Hum dono ke ghar wale chahte the, ki aage badhne se pehle tum aur main, ek dusre se mile, ek dusre ko ache se jane pehchane. Maine toh keh diya tha, ki is sab ki koi jarurat nahi hai. Lekin ghar wale toh ghar wale hai. Wo thodi kisi ki sunte hai.

Urmila (Gusse se) - Tum kya mujhe ullu samajhte ho? Ya main janti nahi hu ki unke dimag mein yeh milne wilne ka idea tumne hi dala hai. Mujhe jarurat hi nahi hai, tumhe aur janne ya parakhne ki. Main abhi se samajh chuki hu kitne chalakh insan ho tum. Abhi bhi keh rahi hu, picha chod do mera. Hath jod rahi hu tumhare aage.

Rohan - Mujhe ek baat batao. Aisi kya kharabi hai mujhme, jo tum mujhse picha chhudwana chahti ho? handsome hu, acha khasa kama bhi leta hu, aur meri baaton ke toh log fan hai. Fir tumhe mujhse itni dikkat kyu hai?

Urmila - Mujhe dikkat tumse nahi, sare hi ladko se hai. Mujhe shadi hi nahi karni hai.

Rohan - Kyu? Kya koi aur pasand hai tumhe?

Urmila - Maine kaha mujhse shadi hi nahi karni hai.

Rohan - aur aise kyu?

Urmila - Tumhe sab janana hai? Zyada janane ki koshish mat karo, tumhare liye behtar hoga.

Rohan (haste huye) - Oh Ho! Kya tum dhamki de rahi ho mujhe? Yahi toh baat hai, isi tumhare andaz ka fan hu main.

Urmila samajh chuki thi, ki Rohan se bahas kar ke koi fayda nahi hai. Wo uski kisi bhi baat ko seriously nahi lega. Isliye wo shant baith gayi, aur pure raste shant hi rahi.

Ab jis restaurant mein, Urmila ke ghar walo ne unki table reserve ki thi, us jagah ke samne ja kar Rohan ne car roki hi nahi, aur wo aage chalata raha. Urmila confuse ho kar uski taraf dekhne lagi. Lekin wo apni dhun mein car chalata raha.

Urmila - restaurant piche reh gaya hai.

Rohan - Pata hai mujhe.

Urmila (shocked) - Toh? Tumne car kyu nahi roki waha?

Rohan - Kyu ki hum kahin aur ja rahe hai.

Urmila - Shuru ho gaye tum aate hi? Ab pata nahi ye sab kar ke kya sabit karna chahte ho?

Rohan - Arey baba relax! Isse bhi badhiya ek jagah hai. Maine waha table book ki hai. Tum chalo tumhe bhi pasand aayegi wo jagah.

Urmila ne kuch nahi kaha. Use bas jaldi se jaldi Rohan ke sath ki ye date khatam kar ke wapas ghar jana tha.

Kuch der baad wo dono pahuch gaye. Ye ek chota sa lekin pyara sa restaurant tha. Rohan ne jo table book ki thi, wo waha ke garden mein, pedo ke bicho bich rakhi huyi thi. Rohan khushi se Urmila ko le kar waha gaya.

Urmila - Toh yeh hai tumhari badhiya jagah? Ek normal sa restaurant hi toh hai.

Rohan - Arey? Kamal karti ho tum? Dekho na kitni pyari jagah hai. Aao, tum pehle baith toh jao.

Rohan ne jhat se Urmila ke liye kursi khichi. Urmila ne bhi ek dusri kursi khichi, aur wo us par baithi. Rohan ne muskura kar uski aur dekha, aur fir wo bhi Urmila ki samne wali kursi par baith gaya.

Rohan menu card dekhne laga. Urmila ne wo bhi dekhne se mana kar diya. Rohan ko ab Urmila ke aise bartav ki aadat si hone lagi thi, aur use uss baat se koi farak nahi padta tha.

Rohan ne menu mein se kuch dishes select kar ke waiter ko order de diya, Aur uske baad usne apna dhyan Urmila ki aur moda.

Urmila yaha waha dekh rahi thi. Jitna ho sake utna wo Rohan ko nazar andaz karne ki koshish kar rahi thi.

Rohan - Hmmmm … Toh batao ab kuch apne bare mein.

Urmila -  Main kuch nahi batane wali. Mujhse sawal jawab mat karo.

Rohan - Arey, mujhe sab janana hai tumhare bare mein. Tumhe kya acha lagta hai, kya bura lagta hai? Tumhara bachpan kaise guzra? Tumhare dost kaun hai? Tum aisi kyu ho?

Urmila (gusse se) - Shadi aur divorce ke alawa koi aur kaam nahi hai kya tumhare pass.

Tumhari pehli biwi tumse jaan chhuda kar chali gayi, aur ab tum mere piche pade ho.

Rohan uski bato par zoron se hasne laga.

Urmila - Tum pagal wagal ho kya? Har baat par hasne lagte ho. Ye lo, aa gaya hai tumhara order. Khatam karo aur jaldi se ghar wapas chhod do mujhe.

Rohan - Are itni bhi kya jaldi hai? Abhi toh aaye hai. Aaram se baithenge, baaten karenge, khayenge piyenge fir ghar jayenge.

Itna keh kar Rohan ki nazar samne rakhe huye pasta ki plate par padi, aur pasta se uske jahan mein Meera ka khayal aaya, aur ek dum se use laga jaise usne Meera ki awaz suni.

‘Ab kya mere kaan bhi bajne lage hai, jo mujhe yaha bhi Meera ki awaz sunayi de rahi hai?’, ye soch kar wo pasta ki plate utha kar Urmila ke samne rakhne laga ki tabhi usne wapas Meera ki awaz suni, aur ab use yakin tha ki ye uska vaham nahi hai.

Usne piche mud kar dekha toh kya? Piche wali table par Meera baithi hui thi, aur uske sath ek behad handsome ladka. Meera ko waha dekh kar Rohan restless ho gaya. Wo koshish karne laga ki Meera usko na dekhe. Lekin uski ye harkat Urmila ke nazar se nahi chhuti.

Urmila - Kya hua? Kon hai wo ladki? Aur use dekh kar pasine kyu chhut gaye tumahre?

Rohan ne Urmila ki baat ka koi jawab nahi diya. Urmila ne pehli baar Rohan ko aise chup baithe huye dekha tha, aur ab usko Rohan ke maze lene ka mauka mil gaya tha.

Urmila - Hmm !!! tum toh bataoge nahi. Chalo main hi guess kar leti hu, ki kon ho sakti hai wo ladki. Kahin … yahi toh tumhari ex wife nahi hai?

Rohan - Koi nahi hai wo. Tum hamari date par concentrate karo na. Lo khana khao.

Urmila excitement se hasne lagi. Wo ab andaza lagane ki koshish kar rahi thi, ki kyu us ladki ko dekh kar Rohan apni nazre chipa raha tha.

Urmila - toh use ye baat nahi pata hai ki tum mujhse shadi karne wale ho .. aur … isi liye tum kahi usse chehra toh nahi chupa rahe? Lekin ye kya baat hui? Use toh pata hona chahiye na ki uske ex husband dusri shadi kar raha hai. Ruko, tum nahi toh main use awaz lagati hu.

Rohan (Gusse se) - Tumhara kya dimag kharab hai kya? Aisa kuch nahi karogi tum. Mere sath aayi ho, hamari date par dhyan do.

Rohan ko gussa hote dekh Urmila ko aur maza aane laga, wo aur joro se hasne lagi.

Urmila - Ab toh banta hai. Usse ab baat karni hi padegi.

Rohan ko pata tha ki Urmila is mamle mein pagal ladki hai. Wo ab jo uske mann mein aaya hai wo kar ke hi manegi. Isliye usne use roka bhi nahi.

Urmila kursi se uthi, aur seedhe Meera jahan baithi thi waha chali gayi. Meera confusion ke sath Urmila ki aur dekhne lagi.

Urmila - Hi! Main darasal yaha apne hone wale pati ke sath apni pehli date par aayi thi. Lekin mujhe abhi bhi pata chala, ki mera hone wala pati, aap ka ex husband hai.

Urmila ki baatain Meera samajh hi nahi pa rahi thi, kyuki use andaza bhi nahi tha ki Rohan ki zindagi me aisa bhi kuch chal raha hai. Wo aur confuse ho gayi, ki Urmila ki baat ka jawab bhi nahi de saki. Isliye Urmila ne uski confusion ko asan karte huye kaha.

Urmila - Mera naam Urmila hai, aur wo waha piche table par baitha hua ladka mera hone wala pati hai, Rohan.

Meera ne Urmila ke piche ki taraf jhank kar dekha. Waha use Rohan ki bas peeth nazar aa rahi thi, lekin wo fir bhi pehchan gayi ki wo Rohan hi tha.

Urmila peeche mudi, aur Rohan ko awaaz dene lagi. Waha Rohan apna sar hath mein pakad kar baitha tha. Urmila ne baar baar awaz lagane par aakhir mein usne peeche mudh kar un sab ki taraf dekha. Meera ko pichle panch minute mein ye sab kya ho raha tha, ye samajhte samajhte hi waqt lag raha tha.

Urmila - Rohan … aao na. Yaha aa kar baitho. Jaldi aao.

Ye keh kar Urmila, wahi Meera aur Neeraj ke sath baith gayi. Ab na chahte huye bhi Rohan uth kar waha aane laga.  Neeraj ab tak chup tha, lekin Urmila ki aisi harkat dekh kar usne kaha.

Neeraj - Dekhiye, yaha koi mazak nahi chal raha hai. Aap please apni jagah par ja kar baithiye, aur hume akela chod dijiye.

Urmila - Arey Rohan ye dekho. Tumhari ex wife bhi date par aayi hai. Tum dono ex husband wife, ek hi din alag alag date par. Sach batao, tum dono ne ye mil kar plan toh nahi banaya hai na?

Urmila hasne lagi, aur usne Rohan ka hath khich kar use bhi kursi par bitha diya.

Urmila - Rohan, ab mujhe milwao toh sahi tumhari ex wife se.

Rohan chup hi baitha raha. Usne kuch nahi kaha. Isliye Urmila ne hi hath aage badha kar kaha.

Urmila - HI! Main Urmila. Rohan ki hone wali biwi.

Meera ne bhi hath badhaya, aur dheere se kaha.

Meera - Hi! Main Meera, aur Ye Neeraj hai.

Neeraj Hi bol pata isse pehle hi Urmila excited ho gayi.

Urmila - Toh matlab aap dono date par aaye ho? Dekho na Rohan, ye log bhi date par aaye hai. Par shayad Rohan ko pata hi nahi tha Meera ki tum bhi kisiko date kar rahi ho? Tum dono bhi shadi karne wale ho kya?

Ab ja kar Rohan ne Meera ki taraf dekha. Urmila ne puche sawal ka jawab use bhi janana tha.  

Meera ne Neeraj ki aur dekha. Use samajh nahi aa raha tha ki is sawal ka jawab wo kaise de? Yahi toh nahi chahti thi wo, ki Neeraj aur Rohan kabhi aamne samne aaye.

Lekin itni der se chup baithe Rohan ko ab jawab chahiye tha.

Isliye usne sidhe Meera ki aankho mein aankhe dal kar pucha.

Rohan - Bolo Meera, Urmila ke sawal ka jawab do.

Meera - Tum shadi kar rahe ho?

Rohan - Han, aur tum?

Rohan Meera ke jawab ka intezaar karta raha, aur Meera usse nazre churane lagi, toh usne kaha.

Rohan - ab baat aayi samajh mein … main samajh hi nahi pa raha tha ki tumhara aisa manparivartan hua kaise? Kyu tum achanak se mutual divorce ke liye razi ho gayi. Kahi yahi toh wajah nahi? Neeraj … toh Neeraj ke sath aage badhna chahti ho na tum? Isi liye tumne mutual divorce ke liye han ki na?

Meera ko jis baat ka dar tha, wahi use ab hote huye nazar aa raha tha. Ab wo Rohan ke sawal ka kya jawab degi? Kya Rohan ab mutual divorce se inkar kar dega? Aur aaj ki is double date se, un charo ke zindagi par kya asar hoga? Janane ke liye padhiye Shaadi Barbadi Aashiqui sirf Orange global stories par.