Rohan ko Urmila ka character bahot mazedaar lag raha tha. Rajan aur Samir usse puch puch kar pareshan ho gaye the, ki aakhir wo iss ladki se shadi kyu karna chah raha tha? Usse shadi karne ke piche uska kya plan tha? Lekin Rohan unke sawalo ko har bar, has kar bas tal de raha tha.

Office se nikalne ke baad Rohan sidhe apne mummy papa ke ghar chala gaya. Wo use waha dekh kar khush ho gaye, ki unka beta, jo bulane par bhi kabhi jaldi ghar nahi aata tha, wo aaj aise achanak ghar aaya hai.

Rohan ke aane ki vajah bhi unhe jaldi hi pata chal gayi. Usne zyada yaha waha ki bate na karte huye, jo baat wo kehne aaya tha, usne wo keh di.

Rohan - Abhi toh Meri aur Urmila ki sagai me bahut waqt hai. Tab tak aap ko nahi lagta ye waqt hum dono ko ek dusre ko behtar tarike se janne me guzarna chahiye.

Mummy - Han beta, baat toh bilkul sahi kahi hai tumne. Ab toh waqt hi waqt hai. Milo ek dusre se, ek dusre ko ache se janane ki koshish karo.

Rohan - lekin mummy ek dikkat hai. Abhi hum ek dusre ko bilkul hi nahi jante. Toh main jaa kar seedhe uske sath milne ki baat nahi kar sakta. Use shayad meri baat ajeeb lage. Toh kyu na aap uske ghar walo se baat karke unhe kahe ki wo aur aap log hi mil kar mera aur Urmila ka kahi bahar milne ka plan banaye. Isse kya hai ki, Urmila ko ajeeb bhi nahi lagega aur wo safe bhi feel karegi.

Mummy - Han han, kyu nahi? Main aur Urmila ki mummy toh kal hi is baare mein baat kar rahe the, ki tum dono ko ab thoda ek dusre se milna julna chahiye, baatein karni chahiye. Aakhir aage puri zindagi kaatni hai ek dusre ke sath. Ek dusre ko isi liye abhi se janna parakhna bahut jaruri hai. Waise toh jaan ke parakh ke bhi konsa hi bahut fayda ho jata hai. Tu aur Meera toh ek dusre ko kitne saal se jante the, lekin aaj kya hua? Ho hi gaye na alag.

Ye keh kar Rohan ki mummy zoro hasne lagi. Lekin unki is baat par na Rohan hasa na Rohan ke papa, ye dekh kar wo turant chup ho gayi.

Rohan - Mummy, aap Urmila ke ghar walo se baat kar ke mujhe batayiyye ki kab hum dono mil sakte hai.

Fir kya Rohan aur Urmila ke ghar wale toh yahi chahte the. Unhone in dono ka do din baad kahi bahar milne ka plan bana diya.

Waha Meera ne Arjun ji ko apna mutual divorce lene ka faisla bata diya tha. Arjun ji toh yahi chhate the, toh wo bhi khush ho gaye. Lekin Meera ke samne ab agla task ye tha, ki use yahi baat ab Rohan ko bhi ja kar batani thi. Uske baar baar badalte huye faislo se Rohan gussa ho sakta tha. Par ab use batana bhi toh jaruri tha. Isliye Meera ne Rohan ko call kar ke sham ko milne ke liye kaha. Rohan ne bhi han kar di aur sham ko dono ka office khatam hone ke baad wo coffee ke liye ek cafe me mile.

Meera ko thoda sa dar tha, ki kahi wapas uske mutual divorce lene ka faisla sun kar Rohan gussa ho kar use mana na kar de. Aur waha Rohan ko dar tha, ki us raat ke baad, Meera kahi emotional ho kar divorce lene se hi na inkar kar de. Use laga ki shayad yahi vajah thi, ki Meera ne use aise achanak se milne ke liye bulaya tha.

Wo dono cafe me baithe the. Coffee aa chuki thi. Meera ne kya baat karne ke liye use waha bulaya tha ye Rohan janne ke liye betaab tha. Lekin Meera baat ki shururat hi nahi kar rahi ye deh kar Rohan ne hi kaha.

Rohan - Bolo. Kya baat karni thi tumhe? Koi tension wali baat toh nahi hai? Sab thik hai?

Meera - Han sab toh thik hai. Humare divorce ke baare me hi mujhe tumse kuch baat karni thi.

Rohan - Acha !!! toh bolo … kya baat hai?

Meera (hichkicha kar) - Wo darasal baat yeh hai ki, mujhe pata hai, main baar baar apna faisla badalte aayi hu, aur is vajah se tumhe aur ghar mein baki sab ko bahut pareshani hui hai. Par fir bhi, main ek aakhiri baar apna faisla badalna chahthi hu.

Ye sun kar Rohan ko ab yakin hone laga tha ki jarur Meera divorce na le kar shadi aage badhane ki baat karne aayi hogi. Lekin fir bhi apne mann ki baat usne apne chehre par na aane dete huye kaha.

Rohan - Han bolo. Koi baat nahi, agar tum apna faisla fir se badalna chahti ho toh.  Tumhara jo bhi fasila hoga, us hisab se aage badhna hai ya nahi badhna hai, wo baad mein dekha jayega.

Ab Meera ko aur tension ho gayi. Use dar lag raha tha ki uske mutual divorce lene ke faisle ko sun kar usne aage badhne se mana kar diya toh? Lekin wo kya karta hai? Use failse ko wo kis tarike se leta hai, ye toh ab use batane ke baad hi pata chalne wala tha.

Meera - Wo actually, Mujhe pata hai, ki main bahut bachpana kar rahi hu. Lekin … Rohan .. Main tayar hu.

Rohan - Tayar ho? Kis baat ke liye?

Meera - Mutual divorce ke liye. Mujhe samajh aa gaya hai ki main galat thi. Khamakha court me ladne ki zid par adi hui thi, jisse hum dono ka nuskan hi hone wala tha, aur kafi sara waqt aur paise bhi barbad hone wale the. Is liye maine ab socha hai ki mujhe tum sab ki baat maan leni chahiye aur isi mein meri aur tumhari aur sab ki bhalai hai.

Meera ke mutual divorce lene ki baat se Rohan itna khush, aur shocked bhi tha, ki usne Meera ki kahi hui aage ki baate suni hi nahi.

Rohan (Khushi se) - Han han. Main toh pehle se hi tayar tha iske liye. Tumhi mana kar rahi thi.

Meera - Han par mujhe ab samajh aa gaya hai ki mutual divorce lena hi sahi faisla hai. Warna khamakha hum dono ka bahut sara waqt aur paisa barbad ho jayega.

Rohan - Bilkul sahi faisla liya hai tumne. Hum dono ke ghar wale bhi tumhare is faisle se bahut khush honge.

Meera - Maine Arjun ji ko bhi bata dia hai. Unhone mujhe sab se pehle tumse baat karne ke liye kaha tha. Tumse baat hone ke baad ab wo aage ki meeting ki date hume batayenge. Toh fir milte hain meeting ke din, Arjun ji ke office mein.

Rohan - Han jarur. Aur Meera … I am happy. Tumne bilkul sahi faisla liya hai.

Meera uth kar nikal hi rahi thi, ki tabhi Rohan ne usse ye kaha, aur Meera use ek smile de kar waha se chali gayi.

Uske jaate hi Rohan ne Rajan aur Samir ko usi cafe mein bula liya. Unn dono ko bhi pata tha ki aaj Meera ne Rohan ko kisi baat ke silsile mein milne bulaya tha. Rohan ka call aate hi dono fatafat cafe chale gaye. Wo janne ke liye bahut beatab the ki aakhir Meera ne kya kehne ke liye use bulaya tha.

Rajan - Jaldi bata kya kaha Meera ne?

Samir - Kya divorce lene se mana kar diya usne?

Rohan - Nahi. aisa kuch bhi nahi kaha usne.

Samir - Toh fir? Aur kya baat ho sakti hai, jiske liye usne tujhe aaj yaha itne jaldbaji mein bulaya tha?

Rajan - kahi use us raat ko le kar toh baat nahi karni thi?

Rohan - Arey nahi baba. Us raat ko le kar usne koi bhi baat nahi kahi. Balki, usne jo kaha, wo humne socha hi nahi tha. Wo, mutual divorce lene ke liye fir se maan gayi hai.

Rohan ki baat sun kar Rajan aur Samir, khushi se apni jagah par hi uchhal pade.

Rajan - Ye badlav usme kaha se aa gaya? Pehle toh wo bilkul tayar nahi thi, mutual divorce ke liye.

Rohan - Badlav chahe jis bhi vajah se aaya ho. Lekin aaya ye bahut acha hua. Jitna jaldi ho sake Meera se divorce le kar ab main Urmila se shadi karna chahta hu.

Samir - Baki sab toh thik hai, lekin humen tera ye Urmila se shadi karne ka faisla kuch samajh nahi aa raha. Aakhir kya dekh kar us ladki ko chuna hai tune?

Rajan - ladki sundar hai, ache ghar ki hai. Lekin … us din office mein jo humne dekha, uske baad, mujhe aur Samir ko nahi lagta, ki tera uske sath shadi karne ka faisla sahi hai. Hum jo keh rahe hai, usse bure tarike se mat le na Rohan. Hum jante hai, Urmila se shadi karne ke piche teri koi thos wajah zaroor hogi. Lekin hum bas tere liye ye nahi chahte  the, ki tera ye Urmila ke sath shadi karne ka faisla tere par bhari na pad jaye.

Samir ne bhi Rajan ki bato mein, han mein han milayi.

Samir - Meera ko toh hum sab bahut waqt se jante hai. Sari cheezo ki shuruat kitne ache se hui thi. Lekin tab kya hume pata tha ki aaj sab kuch is tarah se khatam ho jayega? Lekin aaj Urmila ke mamle mein hume saaf saaf nazar aa raha hai, ki abhi uska bartav aisa hai, toh aage chal kar aur kaisa hoga. Isliye hum dar rahe hai.

Un dono ki Urmila ko le kar raay sun kar Rohan has diya. Rajan aur Samir uske muskurate huye chehre ko dekhte huye uske jawab ka intezaar kar rahe the.

Rohan ne apna waqt liya, aur kaha.

Rohan - Meera se main shadi karne ja raha tha, tab tum dono ki raay li thi maine, aur tum dono ne khushi khushi mujhse kaha tha, ki han mujhe Meera se shadi karni chahiye, kyuki wo aur main tab ek dusre se behad pyar karte the. Lekin kya hua? Kya wo shadi chal payi? Aaj kis mod par khade Main aur Meera? Kya tab hume andaza bhi tha ki ham ek dusre se divorce lenge?Toh ab Urmila ke bartav se hum ye kaise pata laga sakte hai ki kal ko uska bartav aur ajeeb hoga, aur uske sath shadi kar ke mera nuksan hoga? Shayad aisa na ho. Shayad hum dono bahut ache se pyar se ek dusre ke sath humari aage ki zindagi bitaye.

Ab Rohan ki is baat par Rajan aur samir ke pass koi jawab nahi tha. Wo samajh chuke the Rohan ne Urmila se shadi karne ki than li thi. Toh wo uske sath shadi kar ke hi manega. Lekin kya Urmila Rohan ke sath shadi ke liye manegi?

Waha Urmila ko  jab pata chala ki uske ghar wale ab use Rohan ke sath jaan pehchan badhane ke liye, usse milne kahi bahar bhej rahe hai, toh wo apni maa se lad padi.

Urmila - Main aap se keh keh ke thak chuki hu maa ki mujhe us ladke se shadi nahi karni. Uska abhi tak divorce tak nahi hua hai?

Maa - Han toh ho jayega na. Hum kaha abhi tumhari uske sath shadi karwa rahe hai? Divorce ho jayega fir aram se sagai hogi, aur fir shadi. Tab tak tum usse milo toh sahi. Dheere dheere pasand aane lag jayega wo tumhe. Pyar aise hi toh hota hai. Pehle hi din thodi koi  acha lagne lagta hai?

Urmila - Maa baat bas uske divorce ki nahi hai. Lekin wo ladka, nihayati badtameez aur apni hi akad mein rehne wala insan hai. Aise insaan ke sath shadi karne se behatar hai main kuwari hi rahu.

Urmila ki baat par uski maa has padi.

Maa - Pehle ja kar usse mil, baat kar, uske baad bhi agar tumhe wo acha nahi laga toh mujhe aa kar batana.

Urmia - Uske baad kya maa? Uske baad bhi aap ye nahi toh koi aur ladka dhund hi layenge, aur meri shadi kisi na kisi se karwa kar hi rahenge.

Uski baat par uski maa ne bas ek halki si smile di, aur wo uske kamre se bahar nikal gayi.

Akhir aisi kya baat thi? Kyu Urmila kisi bhi ladke se shadi karne ke liye inkar kar rahi thi? Kya wo kisi aur ladke se pyar karti thi, jiske sath uske ghar wale uski shadi nahi karna chahte the? Ya fir koi aur baat thi? Janane ke liye padhiye Shaadi Barbadi Aashiqui sirf Orange global stories par.